Ampo Ordizia vs Vrac Quesos Entrepinares atarikoa
Ligako bigarren sailkatuaren bisita jasoko du igande honetan Ampo Ordiziak Altamiran, Vrac Quesos Entrepinaresena.
Pasa den asteko atsedenaren ondoren, ligako 13. jardunaldiari dagokion partida jokatuko dute ordiziarrek igandean. Partida erabakigarria izango da, Ampo Ordiziak lehenengo sei postuetan sailkatu nahi badu irabaztea beste erremediorik ez baitu izango. Federicoren mutilak 8. postuan daude momentu honetan sailkapenean, bost garaipen eta sei porroteko balantzearekin.
Emaitzei dagokionez, urte hasiera ez da ona izan Goierriko taldearentzat, baina, azken jardunaldian lortutako garaipen sendoak indarrak eman dizkio taldeari, eta hori gutxi ez, partida etxean izanda, Ampo Ordizia duten guztia ematera aterako da berdegunera igandean.
Txapelketan ez dago aurkari errazik, baina igandekoa, agian, egon daitekeen zailenetako bat izan daiteke. Vrac Quesos Entrepinares denboraldi bikaina egiten ari da, eta horren erakusle da bigarren postuan daudela sailkapenean, Sevillako Ciencias taldearen atzetik. Valladolideko taldeak 11 partida jokatu ditu eta hamar garaipen eta porrot bateko balantzea du.
Igandekoa partida lehiatua espero da, eta Altamirara gerturatuko diren ikusle guztiei ikuskizun bikaina eskaintzen saiatuko da taldea. Partida 12:00etan jokatuko da.
Asteburuko gainontzeko partidak
23 urez azpiko taldeak, ere, partida garrantzitsua jokatuko du larunbatean Altamiran. Iñigo Navarrok eta Fisak entrenatutako taldeak Valladolideko beste taldearen bisita jasoko du, Silverstorm El Salvadorrena. Ordiziarrak hirugarren daude sailkapenean zazpi garaipen eta bost porroteko balantzearekin, eta joko polita erakusten ari dira. Esan bezala, partida larunbatean jokatuko da, arratsaldeko 16:00etan.
