Ciencias Enerside vs Ampo Ordizia atarikoa
Bidaia zaila du asteburu honetan Ampo Ordiziak. Sevillara bidaiatu beharko dute goierritarrek Ciencias Enerside taldearen aurka indarrak neurtzeko.
Federicoren taldeak ez du urtea ondo hasi. Pasa den astean porrot gogorra jasan zuen Madrilgo Cisneros taldearen aurka etxean, Altamiran. Taldeak baja ugari izan zituen eta zelairatutako hamabostekoan aldaketa ugari ikusi genituen. Asteburu honetarako, ordea, goierritarrek zenbait jokalari berreskuratuko dituzte. Ampo Ordizia 9. postuan aurkitzen da momentu honetan sailkapenean. 8 partida jokatu dituzte eta 4 garaipen eta 4 porroteko balantzea dute. Asteburu honetan mahaiaren gainean kolpe bat emateko aukera izango du Federicok zuzentzen duen taldea Sevillaren aurka. Helburua garbia da, garaipenaren bidera itzultzea eta urtea amaitu geuen dinamika on horri ahalik eta azkarren berriro heltzea.
Aurkaria ez da erraza izango, ordea, Real Ciencias Enerside taldea denboraldi bikaina egiten ari baita momentuz. Sailkapenean bigarren postuan daude zazpi garaipen eta porrot bateko balantzearekin. Azkeneko partida izan da jokatu dituzten zortzi partidetan galdu duten bakarra, eta liderraren aurka izan zen, Vrac-en aurka.
Igande honetako partida gogorra izango da zalantzarik gabe, baina ordiziarrak indartsu zelairatuko dira garaipena eskuratzeko asmoarekin. Partida igandean jokatuko da, 12:30tan Sevillako Cartuja zelaian.
Asteburuko partida gehiago
23 urtez azpiko taldeak ere partida erakargarria jokatuko du larunbatean Altamiran. Liderraren bisita jasoko dute gure gazteek, Madrilgo Complutense CIsneros taldearena. Iñigo Navarro eta Fisak entrenatutako taldea hirugarren dago sailkapenean sei garaipen eta lau porroteko balantzearekin. Partida larunbatean jokatuko da arratsaldeko 16:00etan Altamiran.
Asteburuari hasiera 16 urtez azpiko taldeak emango dio Ordizian, larunbatean 10:30tan Durangoren aurka. Partida hau amaitutakoan 12:00tan 18 urtez azpiko taldearen txanda izango da aurkari berdinaren aurka.
Larunbateko azkeneko partida beteranoek jokatuko dute Hernaniren aurka 20:15etan Altamiran.
